Goierriko Hitza

Bihar arratsaldeko zazpietan hasita, Martxel Aizpuru Giez-Berri SL eztiolako gerenteak, eztiaren labela nola lortzen den azalduko du kultur etxean. Hitzaldi horrekin emango diote aurten hasiera zegamarrek Erlezain Egunaren harira aste osorako antolatu duten egitarauari. Ostegun iluntzean Tolosako Joxe Mari Gorrotxategi gozogile famatuak gozogintzaren lehen urratsei buruz hitzaldia eman ondoren Zegamako intxaur pastak aurkeztuko dituzte. Garai batean Zegamako zenbait emakumek kanpora lanera joandakoan almendrekin pastak egiten ikasi omen zuten. Herrira etorri eta almendrarik ez zutelako intxaurrekin egiten zituzten nonbait. Orain Zegama Okindegiko Kepa Galparsorok intxaur pastak sortu ditu eta horixek dira hain zuzen ostegunean aurkeztuko direnak. Bertaratzen direnek pasta horiek dastatzeko aukera ere izango dute.

Larunbatean 2008ko Urrezko Aizkolarien Txapelketako Kanporaketa jokatuko da. Senosiain II.nak Atutxa II.na izango du aurkari eta Patxi Mindegiak Iñaki Aierbe. Perurena aita-semeak ere han izango dira harriekin erakustaldia egiten.
Erlezain Eguna bera igandean ospatuko dute. Aurten lau erlezain omenduko dituzte festaren barruan: Jose Zurutuza lezoarra, Santi Matxain lazkaotarra, Jabier Ugarte oñatiarra eta Juan Iñurrategi legazpiarra.
Arratsaldean bertso jaialdia izango da pilotalekuan Kasino elkarteak antolatuta eta Zegamako Kultura Batzordeak babestuta. Sei bertsolarik parte hartuko dute: Andoni Egaña, Aitor Mendiluze, Beñat Gaztelumendi, Jon Martin, Jexux Mari Irazu, Aitor Sarriegi, Unai Agirre eta Iker Zubeldiak.