Goierriko Hitza

2008-01-21 | 14:53:14

18/98 auzian zigortutako Inma Berriozabal atxilotu du Guardia Zibilak Zegaman

Etxean atzeman dute, eta eskuburdinak jarrita eraman. 12 urteko zigorra ezarri zioten, enpresen atalean.

Inma Berriozabal atxilotu du Guardia Zibilak eguerdian, Zegamako bere etxean. Ordubatak baino lehen gertatu da atxiloketa, eta kalez jantzitako guardia zibilek egin dute. Eskuburdinak jarrita eraman dute Berriozabal. 18/98 auziaren barruan enpresen atalean epaitu zuten Berriozabal, eta 12 urteko espetxe zigorra ezarri zioten.

Erantzun 1

2008-01-09 | 16:02:06

Europako Txapelketa hartuko du aurten Zegama-Aizkorri mendi maratoiak

Maiatzaren 25ean jokatuko da VII. maratoia; izena emateko epea astelehenean irekiko dute

Zegama-Aizkorri mendi maratoiak 2008ko Skyrunning Europako Txapelketa hartuko du aurten. Proba ezaguna maiatzaren 25ean jokatuko da, eta ibilbideak ez du aparteko aldaketarik izango, antolatzaileek gaur azaldu dutenez. Izena emateko moduan etorriko da aldaketa, aurten, internet bidez bakarrik egin ahal izango baita. Epea hilaren 14an irekiko dute, eta 25era bitartean izango da izena emateko aukera www.zegama-aizkorri.com webgunean. Guztira 400 dortsal banatuko dituzte; hauetatik 100, goi mailan dabiltzan kirolarientzat gordeko dituzte; beste 125, orain arteko ekitaldi guztietan parte hartu dutenentzat eta azken bietan denborarik onenak egin dituztenentzat izango dira; gainontzeko 175 dortsalak zozketa bidez banatuko dituzte.

Ez du erantzunik

2007-11-10 | 17:41:48

Behirik eta ardirik gabe baina jende ugari San Martin azokan

Idiazabalgo Aranburu elkarteak irabazi du gazta lehiaketa

Mingain urdinen gaitzak markatutako eguna izan da gaurkoa Zegaman. Izan ere, artzain eta abeltzainek ezin izan dute ardirik eta behirik ekarri azokara. Hala ere, jende ugari bildu da Zegaman, eguraldiak lagunduta. Animaliei dagokionean, behorrak, astoak eta zaldiak izan dira nagusi herriko kaleetan. Gainontzean, artisauen eta nekazarien produktuek eta postuek erakarri dute jendearen arreta. Aizkorri eta Urbiako gazta lehiaketan berriz, Aranburu elkarteak irabazi du sari nagusia, hirugarren urtez jarraian.

Ez du erantzunik

2007-11-07 | 16:15:50

Zegamako San Martin azoka behirik, ardirik eta ahuntzik gabe egingo da

Mingain urdinaren gaitza dela eta hartu dute neurri hori; mendiko eta etxeko behorrekin egingo da lehiaketa

Mingain urdinaren gaitza dela eta Zegamako San Martin azokan aurten ez da behirik, ardirik eta ahuntzik izango. Mendiko eta etxeko behorren lehiaketa ordea normaltasunez egingo dute. Hiru animalia mota horiek azokara eraman ezin direnez bertako baserritarrei dei egin zaie beste animalia batzuk eramateko. Untxiak, txakurrak, oiloak eta basurdeak izango dira, besteak beste ikusgai. Landare, fruitu eta barazkien erakusketa, artisau eta eskulangintza erakusketa, gazta aintzinako erara egitea eta beste hainbat erakusketa izango da bertan. Urbia eta Aizkorriko Artzainen Arteko IX. Gazta Lehiaketa ere egingo dute.

Ez du erantzunik

2007-09-24 | 00:13:20

Kilian Jornet katalanak irabazi du VI. Zegama-Aizkorri maratoia

Corinne Favre frantziarra izan da azkarrena emakumezkoetan

Goi mailako kirol ikuskizunarekin gozatu zuten atzo Aizkorriko magalean bildu ziren zale eta ikusleek. Abiatu zirenetatik 348 korrikalarik lortu zuten proba gogorra bukatzea. Denetan azkarrena, 19 urteko gazte bat izan zen, Kilian Jornet katalana. 3.56:59ko denbora behar izan zuen probak zituen 42 kilometroak bukatzeko. Lau orduz azpitik sartu zen bigarrena ere, Raul Garcia. Aurreneko euskalduna, hirugarren postuan iritsi zen Zegamako helmugara; Zuhaitz Ezpeleta izan zen, 4.03:58ko denborarekin. Emakumezkoetan, duela bi urte lortu zuen garaipena berretsi egin zuen Corinne Favre frantziarrak. Lau ordu eta berrogeita hamar minutu behar izan ditu aurten, 2005ean baino hamahiru minutu gutxiago. Angela Mudge, iazko irabazlea, bigarren sartu zen, Favrerengandik 3 minutura. Beteranoetan berriz, Andres Unzurrunzaga ibili zen arinen (4.28:35); emakumezkoetan, Helena Perez (5.35:43).

• ZEGAMA-AIZKORRI MARATOIA: SAILKAPENA

Ez du erantzunik

2007-09-20 | 11:38:51

Zenbait korrikalari ez da izango Zegama-Aizkorri maratoian

Horrela igande goizean 428 korrikalari izango dira irteeran

Azken orduotan bost korrikalarik jakinerazi dute ez direla Zegaman izango Zegama-Aizkorri mendi maratoian parte hartzeko. Ricardo Mejia mexikarra, Fulvio Dapit italiarra, Agustí Roc katalandarra eta Malaisiako bi ordezkari izan dira azken orduotan antolakundearekin harremanetan jarri eta igandean maratoirako ezin direla etorri adierazi dutenak. Ricardo Mejiak eta Agustí Roc-ek neke fisikoa dute arrazoi, Fulvio Dapitek beso bateko hezur haustura eta malaisiarrek eskuratu behar zieten diru-laguntzarik jaso ez izana. Horrela bada, igandean goizeko bederatzietan 428 korrikalari izango dira Zegamako irteeran mendi maratoiari aurre egiteko.

Ez du erantzunik

2007-09-06 | 18:40:09

Gizonezko bat erreskatatu dute helikopteroz, Aizkorrin erori eta gero

60 urteko mendizale eibartarrak 14:00etan izan du erorikoa

Gaur arratsaldean Eibarko mendizale batek erorikoa izan du gaur 14:00etan Aizkorri mendizerran, eta Ertzaintzaren helikopteroa beharrezkoa izan da istripuaren lekutik erreskatatzeko. Mendikatearen hegal batean izan du erorikoa, Aizkorritik Urbia aldera, eta min hartuta geratu da 60 urteko gizonezkoa. Zenbait hezur hautsi ditu kolpearen ondorioz. Helikopteroz Miramongo (Donostia) heliportura eraman dute mendizalea, eta handik anbulantzian Donostia Ospitalera. Herrizaingo Sailak ez du haren osasun egoeraren edo zaurien larritasunaren berririk eman.

Ez du erantzunik

2006-05-03 | 19:31:18

Zauriturik gabeko istripua gertatu da goizean Zegaman

Traktore batek eta kotxe batek elkar jo ondoren, traktorea irauli egin da

Zauriturik ez da izan gaur goizean Zegaman gertatu den trafiko istripuan, nahiz eta zalapartatsu gertatu. Traktore handi bat errepidean iraulita geratu da, beste beribil bat jo ondoren. Kotxea traktorea aurreratzen hasi da, Zegamarako sarreran; traktorea desbideratu eta makinaren atzeko gurpilen kontra jo du autoak.

Ez du erantzunik